៣/អំពីជំនឿទាក់ទងនឹងការធ្វើនំបញ្ចុក

ដូចបានជម្រាបខាងលើរួចមកហើយថាប្រជាជាតិកម្ពុជា មានវប្បធម៌ អរិយធម៌ ខ្ពង់ខ្ពស់ សម្បូរទំនៀមទម្លាប់និងប្រពៃណីផ្សេងៗ។ យ៉ាងណាមិញរាល់ការសាងសង់ បង្កើតផលិតនូវអ្វីមួយ សុទ្ធសឹងមានវិធីផ្តើមឬតំណមខ្លះៗជាដរាប។
ក្នុងការផលិតនំបញ្ចុកក៏មានពិធីបន្តិចបន្តួចនិងតំណមខ្លះៗដែរ ដែលទន្ទឹមនឹងការប្រើ ប្រាស់កម្លាំងសមត្ថភាពរបស់រូប គឺនៅមានពឹងលើកម្លាំងខាងក្រៅផងដែរ។

មុននឹងចាប់ផ្តើម អ្នកផលិតតែងអុជទៀនធូប អមដោយដង្វាយជាសំណែនបន្តិចបន្តួច មាននំនែកផ្លែឈើស្លាបារី បន់ស្រន់ចំពោះទេវតា​ អ្នកតា ឬម្ចាស់ទឹកដី សុំឱ្យជួយថែរក្សា សុំឱ្យបានសេចក្តីសុខចម្រើនក្នុងមុខរបររបស់ខ្លួន។

          ចំពោះតំណមអ្នកធ្វើនំបញ្ចុក បានប្រកាន់ជំនឿខ្លះៗ ទៅតាមចំណាំរៀងៗខ្លួនរហូតដល់គេអះអាងថា មានភាពសក្តិសិទ្ធទៀតផង។ គឺនៅពេលកំពុងធ្វើគេតមមិនឱ្យមានឈ្លោះប្រកែកគ្នា មិនឱ្យយកភ្លើងពីជើងក្រាន បន្តទៅក្រៅ ឬអុជបារី យកអ្វីមកដុតអាំងចម្អិន នៅក្នុងជើងក្រាននោះជាដើម។ ប្រសិនបើប្រព្រឹត្តកន្លងប្រការណាមួយនោះ នឹងនាំបណ្តាលឱ្យមានបាតុភូតផ្សេងៗ ដូចជានំធ្វើពុំបានល្អ ម្សៅជ្រាយជ្រុល ឬសរសៃនំផុយដាច់ៗជាដើម។