កំណាព្យប្រកួតជាមួយស្រីស្អាត

កំណាព្យ កំណាព្យប្រកួតជាមួយស្រីស្អាត

(បទកាកគតិ)

១/ កំណាព្យបុរាណ តែងតាមលំអាន

តាមបទផ្សេងៗ បើតាមសិក្សា

បទកាព្យតាក់តែង រៀបរាប់ជាក់ស្តែង

មាន១៣បទ។

២/ ១៣បទនេះ ជាគោលត្រិះរិះ

តាងដោយប្រាកដ តាមការសិក្សា

មានកាព្យច្រើនបទ បើរាប់សន្មត់

ស្មេរចិត្តសិបបួន។

៣/ តាមបទនីមួយ ព្យាង្គជួនជំនួយ

រណ្តំតាមក្បួន មានបែបមានបទ

តាមឃ្លាព្យាង្គជួន មានគ្រប់ចំនួន

ក្នុងវគ្គឆ្លងវគ្គ។

៤/ សម្ផស្សកំណាព្យ សម្រស់ពាក្យកាព្យ

មានន័យជឿជាក់ សម្ផស្សក្នុងក្រៅ

គ្មានជាប់ជំពាក់ អានហើយចង់ញាក់

នឹកស្មានមិនដល់។

៥/ ស្រីស្អាតសម័យ ឲ្យយុវវ័យ

ក្តីជ្រួលច្របល់ លង់និងស្នេហា

តាំងកើតអំពល់ គំនិតវិលវល់

នៅក្នុងចិន្តា។

៦/ ស្រីស្អាតឆើតឆាយ ល្អគន់ពីឆ្ងាយ

ក្លិនឈ្ងុយដូចផ្កា តែវាមិនទៀង

ថាជាយ៉ាងណា តែមនុស្សត្រូវការ

ក្លិនផ្កាស្រស់ស្រី។

៧/ សាច់សថ្ពាល់ខួច សម្បូរមនុស្សលួច

ស្នេហ៍ពៅពិសី មិនថាយុវជន

សូម្បីកវី លង់សម្រស់ស្រី

ម្តងម្កាលខ្លះដែរ។

៨/ ក្លិនក្រអូបសាយ នាសាទាំងឡាយ

តាមហិតអ៊ួអែ លង់និងស្រីស្អាត

តាំងពីបុព្វេ មានជាប់ហូរហែរ

មិនចេះស្កប់ស្កល់។

៩/ កំណាព្យកវី យកមកកែខៃ

ប្រៀបធៀបឲ្យយល់ កាព្យនិងស្រីស្អាត

សុំមានយោបល់ បើលោកអ្នកឆ្ងល់

អាចសួរខ្ញុំបាន។

១០/ សាកគិតសិនទៅ ថាគួរជ្រើសផ្លូវ

មួយណាសុខសាន្ត នារីស្រីស្អាត

និងកាព្យចំណាន លោកអ្នកជ្រើសបាន

គ្មានដាក់ទោសពៃ។

១១/ កំណាព្យប្រកួត ជាមួយអំនួត

នារីសម័យ ថាជាយ៉ាងណា

វ័យយុវវ័យ ដើរលើវិថី

សម័យជឿនលឿន។