ចម្រៀង

ចម្រៀង ចិញ្ចៀនបញ្ជាប់ពាក្យ

អ្នកតែង លោក គិន ធារ៉ា

I.ព្រឹកព្រាងព្រហាម......នាមអ្នកចូលស្តី

ដណ្តឹងកូនស្រី...........ស្របតាមច្បាប់ខ្មែរ

ទំនៀមទម្លាប់............រួមរក្សាថែ

ជាកេរតំណែល..........តាងជាតិវប្បធម៌។

II.ថ្ងៃនេះជាថ្ងៃ..............សិរីមង្គល

កើតមានចូលដល់.......គូស្នេហ៍ស្មោះសរ

ចូលស្តីដណ្តឹង............ទំនៀមវប្បធម៌

មរតកបវរ..................ដោយសារកូនខ្មែរ។

R.ចិញ្ចៀននាងដៃ..........ក្នុងថ្ងៃភ្ជាប់ពាក្យ

យើងទាំងពីរនាក់........សច្ចាស្បថស្បែ

ចាប់ពីថ្ងៃនេះ.............កសាងក្តីស្នេហ៍

គ្មានពាក្យប្រួលប្រែ....គ្នានិងគ្នាឡើយ។

III.ញាតិមិត្តបងប្អូន.........ធ្វើជាសក្ខី

ថ្ងៃនេះថ្ងៃថ្មី..............គ្មានពាក្យអង្គើយ

ផ្តាច់ខ្សែចំណង.........ភ្ជាប់ពាក្យនេះឡើយ

មានតែចម្លើយ.........រៀបមង្គលការ។

១០ មករា ២០១៧