Literature Survey.com.kh: ជីវប្រវត្តិ ត្រឹង ងា និងរិយារបស់គាត់

Monday, 4 June 2018

ជីវប្រវត្តិ ត្រឹង ងា និងរិយារបស់គាត់

ជីវប្រវត្តិ ត្រឹង ងា

លោកសាស្ត្រាចារ្យ ត្រឹង ងា គឺជាអ្នកនិពន្ធសៀវភៅប្រវត្តិសាស្ត្រខ្មែរ(ភាគទី១និងភាគទី២)ដែលបានបោះពុម្ពផ្សាយនៅក្នុងឆ្នាំ១៩៧៣ (សម័យសាធារណរដ្ឋខ្មែរ) ។ លោកត្រូវបានពួកខ្មែរក្រហមយកទៅសម្លាប់នៅគុកទួលស្លែង (ភ្នំពេញ) នៅខែវិច្ឆិកា ឆ្នាំ១៩៧៥ ពេលដែលគាត់និងក្រុមគ្រួសារកំពុងស្ថិតនៅ ភូមិក្បាលដំរីក្រោម ស្រុកកោះធំ ខេត្តកណ្តាល ។

ប្រវត្តិផ្ទាល់ខ្លួន

លោក ត្រឹង ងា (Tran Ngea) កើតនៅថ្ងៃទី ២ ខែមករា ឆ្នាំ១៩៣៧ នៅស្រុកយីងចូវ ខេត្តពលលាវ កម្ពុជាក្រោម ។ ឪពុករបស់លោកឈ្មោះ ឡាំ ស៊ុង (ជនជាតិខ្មែរ) និងម្តាយរបស់លោកឈ្មោះ ទិន សៀម (ជនជាតិខ្មែរ) ។ លោកជាជនជាតិខ្មែរម្នាក់ដែលរស់នៅក្រោមការគ្រប់គ្រងរបស់ រដ្ឋាភិបាលវៀតណាមខាងត្បូង ។ លោកត្រឹង ងាបានសិក្សាថ្នាក់បឋមសិក្សានៅស្រុកយិងចូវ ខេត្តពលលាវ កម្ពុជាក្រោម ។

ដោយសារតែ មានការធ្វើទុក្ខបុកម្នេញ របស់រដ្ឋាភិបាលវៀតណាមខាងត្បូង មកលើ ប្រជាពលរដ្ឋខ្មែរនៅទីនោះ លោកត្រឹង ងាក៏បានសម្រេចចិត្តភៀសខ្លួន ចូលមកនៅទីក្រុងភ្នំពេញ នៅក្នុងឆ្នាំ១៩៥៦លុះដល់ឆ្នាំ១៩៦៥ ទើបឪពុកម្តាយរបស់លោកមករស់នៅទីក្រុងភ្នំពេញតាមលោកដែរ ។ លោកត្រឹង ងាបានបន្តការសិក្សារបស់លោកនៅទីក្រុងភ្នំពេញរហូតដល់ទទួលបានសញ្ញាបត្រមធ្យមសិក្សាភាគទី១ (សញ្ញាប័ត្រ Bac I) ក្នុងឆ្នាំ១៩៥៦ ។ ក្រោយពីប្រឡងជាប់សញ្ញាប័ត្រមធ្យមសិក្សាភាគទី២ (សញ្ញាប័ត្រ Bac II) នៅក្នុងឆ្នាំ១៩៥៧ លោកក៏បានចាប់យកអាជីពជាគ្រូបង្រៀន ហើយបានផ្លាស់ទៅធ្វើការនៅទីរួមខេត្តបាត់ដំបង ។

នៅឆ្នាំ១៩៥៨ លោក ត្រឹង ងា បានរៀបអពាហ៍ពិពាហ៍ជាមួយអ្នកគ្រូបង្រៀនម្នាក់ឈ្មោះឡាយ ហ៊ុនគី ដែលមានដើមកំណើតនៅភូមិស្រមោច ឃុំព្រះនេត្រព្រះ ស្រុកព្រះនេត្រព្រះ ខេត្តបាត់ដំបង (បច្ចុប្បន្នជាខេត្តបន្ទាយមានជ័យ) ។ អ្នកស្រី ឡាយ ហ៊ុនគី ក្រោយមកក៏បានផ្លាស់ឈ្មោះជាអ្នកស្រី ត្រឹង ងា ។ ការផ្លាស់ឈ្មោះតាមស្វាមីនេះគឺជាការធ្វើតាមទម្លាប់បារាំងរបស់អ្នករដ្ឋការខ្មែរសម័យនោះ ។ អ្នកស្រីឡាយ ហ៊ុនគីបាននិពន្ធសៀវភៅអរិយធម៌ខ្មែរ សម្រាប់ថ្នាក់ទីបញ្ចប់ ដែលបានបោះពុម្ពផ្សាយនៅក្នុងឆ្នាំ១៩៧៤ និង១៩៧៥ ។ កាលណោះអ្នកស្រី ឡាយ ហ៊ុនគី បានដាក់ឈ្មោះអ្នកនិពន្ធថា «អ្នកស្រី ត្រឹង ងា» ។ មានមនុស្សមួយចំនួនមានការភ័ន្តច្រឡំស្មានថាអ្នកស្រី ត្រឹង ងា និងលោក ត្រឹង ងា ជាមនុស្សតែម្នាក់ ។

ក្រោយពីធ្វើការមួយរយៈនៅទីរួមខេត្តបាត់ដំបង នៅក្នុងឆ្នាំ១៩៦១ លោក ត្រឹង ងា និងអ្នកស្រី ឡាយ ហ៊ុនគី បានផ្លាស់ប្តូរទីលំនៅមកកាន់ទីក្រុងភ្នំពេញវិញ ។ នៅពេលនោះលោក ត្រឹង ងា ក៏បានចូលបម្រើការងារនៅក្រសួងអប់រំ ហើយលោកក៏បានបន្តការសិក្សា នៅមហាវិទ្យាល័យអក្សរ-សាស្ត្រ ។ ដោយការខិតខំព្យាយាមសិក្សា លោក ត្រឹង ងា បានប្រឡងជាប់បរិញ្ញាបត្រផ្នែកវប្បធម៌ និងអរិយធម៌អាស៊ីនៅក្នុងឆ្នាំ១៩៦៥ ។

អ្នកស្រី ឡាយ ហ៊ុនគី និងកូនប្រុសទី៣ នាស្រុកមង្គលបូរី ខេត្តបន្ទាយមានជ័យ (២០១៦)

នៅក្នុងឆ្នាំ១៩៧៣ លោក ត្រឹង ងា បានចាប់ផ្តើមនិពន្ធសៀវភៅ ប្រវត្តិសាស្ត្រខ្មែរ ដែលមាន២ភាគ(ភាគទី១និងភាគទី២)។ ស្នាដៃរបស់លោកត្រូវបានមហាជនទទួលស្គាល់យ៉ាងទូលំទូលាយក្នុងចំណោមសិស្ស និស្សិត បញ្ញាវ័ន្តទាំងក្នុងនិងក្រៅប្រទេស ។ ដោយសារតែភាពល្បីល្បាញនេះទើបក្រសួងអប់រំនាសម័យនោះ(សាធារណរដ្ឋខ្មែរ)បានយកអត្ថបទនៅក្នុងសៀវភៅប្រវត្តិសាស្ត្រខ្មែរ ដាក់ចូលទៅក្នុងកម្មវិធីសិក្សារបស់ជាតិ ។ ចាប់តាំងពីការបោះពុម្ពផ្សាយលើកដំបូង នាឆ្នាំ១៩៧៣ សៀវភៅនេះត្រូវបានមជ្ឈដ្ឋានទូទៅចាប់អារម្មណ៍និងឲ្យតម្លៃរហូតដល់សម័យបច្ចុប្បន្ន ។

ឆ្នាំ១៩៧៣ ដល់ឆ្នាំ១៩៧៤ លោកត្រឹង ងា ត្រូវបានតែងតាំងជាអគ្គលេខាធិកានៃវិទ្យាស្ថានខ្មែរ-មន លុះក្រោយមកទៀតលោកត្រូវបានតម្លើងឋានៈជានាយកនៃវិទ្យាស្ថានខ្មែរ-មន។ នៅទីនោះលោកត្រឹង ងាបានបន្តការងាររបស់លោកក្នុងការងារបម្រើប្រទេសជាតិរហូតដល់ឆ្នាំ១៩៧៥ ។

លុះដល់ថ្ងៃទី១៧ មេសា ១៩៧៥ ពេលដែលពួកខ្មែរក្រហម ចូលកាន់កាប់ភ្នំពេញ លោក ត្រឹង ងានិងក្រុមគ្រួសារត្រូវបានជម្លៀសចេញពីផ្ទះទៅកាន់ភូមិក្បាលដំរីក្រោម ស្រុកកោះធំ ខេត្ត កណ្តាល ដូចប្រជាជនដទៃទៀតដែរ ។ នៅក្នុងរបបខ្មែរក្រហម មានការតាមដាន ស៊ើបរកមន្ត្រីទាហាន ប៉ូលិស និងរដ្ឋការដែលបម្រើការងារក្នុងរបបសាធារណរដ្ឋខ្មែរ ។ ដោយសារតែខ្វះបទពិសោធន៍ជាមួយពួកកុម្មុយនីស្តនិងខ្វះការប្រុងប្រយ័ត្នលោក ត្រឹង ងា និងអ្នកស្រី ឡាយ ហ៊ុនគី មិនបានកែឈ្មោះឫុលាក់ប្រវត្តិពិតដែលជាសាស្ត្រាចារ្យនៅក្នុងរបបសាធារណរដ្ឋខ្មែរឡើយ ។ លុះដល់ខែវិច្ឆិកា ឆ្នាំ១៩៧៥ មានកម្មាភិបាលខ្មែរក្រហមម្នាក់ បានមកជួបលោក ត្រឹង ងា ហើយបាន«ស្នើរ»ឱ្យលោក ត្រឹង ងា ទៅជួយរៀបរៀងទស្សនាវត្តីរបស់កម្ពុជាប្រជាធិបតេយ្យ ដោយស្អែកឡើងឱ្យទៅជាមួយវា។ ពេលនោះលោក ត្រឹង ងា ហាក់ដូចជាបានដឹងខ្លួនជាមុនដែរថាពួកខ្មែរក្រហមគ្មានបំណងល្អជាមួយលោកទេ តែបើលោកសម្រេចចិត្តថារត់គេច តើក្រុមក្រួសារលោកនឹងទៅជាយ៉ាងណា? ដូច្នេះហើយទើបលោក ត្រឹង ងា សម្រេចចិត្តថាត្រូវទៅតាមកម្មាភិបាលខ្មែរក្រហមរូបនោះ។

យោងតាមសៀវភៅកំណត់ត្រារបស់អ្នកជាប់ឃុំឃាំងនៅគុកទួលស្លែងដែលខ្មែរក្រហមហៅថា«មន្ទីរស២១» លោក ត្រឹង ងា ត្រូវបានបញ្ជូនទៅដល់គុកទួលស្លែងនៅថ្ងៃទី២០ ខែវិច្ឆិកា ឆ្នាំ១៩៧៥ ។ អ្នកស្រី ឡាយ ហ៊ុនគី ជាភរិយាបានរកឃើញថាកាលបរិច្ឆេទនៃការសម្លាប់លោក ត្រឹង ងា

(លោកត្រឹង ងា និងអ្នកស្រីឡាយ ហ៊ុនគី ក្នុងថ្ងៃអពាហ៍ពិពាហ៍ ឆ្នាំ១៩៥៨)

គឺមិនបានដាក់ចូលក្នុងសៀវភៅនេះទេ គឺមិនដឹងមកពីមូលហេតុអ្វី។ ប៉ុន្តែក្រុមគ្រួសារលោក ត្រឹង ងាដែលសល់ពីការស្លាប់ បានសន្និដ្ឋានថាលោក ត្រឹង ងា ពិតជាត្រូវបានខ្មែរក្រហមធ្វើទារុណកម្ម និងសម្លាប់នៅទីនោះយ៉ាងសាហាវដូចជាអ្នកជាប់ឃុំឃាំងដទៃទៀតដែរ ។ លោក ត្រឹង បញ្ចារុណ ដែលជាកូនប្រុសទី៣ របស់លោក ត្រឹង ងា បានស្រាវជ្រាវរកឃើញឯកសារសារភាពរបស់លោក ត្រឹង ងានៅគុកទួលស្លែងដែលមាន៨ទំព័រ ពីមជ្ឈមណ្ឌលឯកសារកម្ពុជា ។

នៅក្នុងនោះលោក ត្រឹង ងា ត្រូវបានពួកខ្មែរក្រហមលោកត្រឹង ងា និងអ្នកស្រីឡាយ ហ៊ុនគី ក្នុងថ្ងៃអពាហ៍ពិពាហ៍ ឆ្នាំ១៩៥៨ បង្ខំឱ្យសារភាពថាលោកគឺជាភ្នាក់ងារCIAមួយរូប ដែលប៉ុនប៉ងប្រឆាំងនឹងរបបខ្មែរក្រហម ។ យោងតាមសម្តីអ្នកស្រី ឡាយ ហ៊ុនគី ជាភរិយា បានបញ្ជាក់ថា លោក ត្រឹង ងា ជាមនុស្សមិនសូវចូលចិត្តធ្វើនយោបាយទេ គាត់មិនបានចូលរួមជាមួយសកម្មភាពនយោបាយណាមួយរបស់របបសាធារណរដ្ឋខ្មែរឡើយ ដូច្នេះចម្លើយសារភាពរបស់លោក ត្រឹង ងា នៅគុកទួលស្លែងទាក់ទងនឹងសកម្មភាពនយោបាយ ជាពិសេសភ្នាក់ងារCIA គឺជាចម្លើយសារភាពដោយសាររងទារុណកម្មតែប៉ុណ្ណោះ គេមិនអាចយកជាការពិតបានទេ ។

សូមបញ្ជាក់ថានៅក្នុងរបបខ្មែរក្រហម ឪពុក ម្តាយ កូនប្រុសទី១ និងកូនស្រីទី២ របស់លោកត្រឹង ងា ក៏បានបាត់បងជីវិតដោយសារជំងឺគ្មានថ្នាំព្យាបាលដែរ ។ កូនប្រុសទី៣ឈ្មោះ ត្រឹង បញ្ចារុណ បច្ចុប្បន្នរស់នៅទីក្រុងភ្នំពេញ ឯកូនប្រុសទី៤ ឈ្មោះ ត្រឹង សុន្ថារ៉ា បច្ចុប្បន្នរស់នៅប្រទេសអូស្ត្រាលី ។ ចំពោះអ្នកស្រី ឡាយ ហ៊ុនគី ដែលជាភរិយាសព្វថ្ងៃរស់នៅស្រុកមង្គលបូរី ខេត្តបន្ទាយមានជ័យ។

ទស្សនាកិច្ចសម្ភាសន៍របស់លោក ត្រឹង សុន្ថារ៉ា(កូនប្រុសទី៤)ជាមួយKhmer Queensland Media អំពីប្រវត្តិលោក ត្រឹង ងា ។ លោក ត្រឹង សុន្ថារ៉ា ជាវិស្វករសំណង់ស៊ីវិល ដែលត្រូវជាកូនប្រុសបង្កើត លោកសាស្រ្តាចារ្យ ត្រឹង ងា និង អ្នកស្រី សាស្ត្រាចារ្យ ឡាយ ហ៊ុន គី ហៅអ្នកស្រី ត្រឹង ងា អំពីប្រវត្តិនៃក្រុមគ្រួសាររបស់លោក។ លោកសាស្ត្រាចារ្យ ត្រឹង ងា និងអ្នកស្រី ត្រឹង ងា ជាអ្នកនិពន្ធសៀវភៅប្រវត្តិសាស្ត្រខ្មែរ និងសៀវភៅអរិយធម៌ខ្មែរដ៏ល្បីល្បាញនៅប្រទេសកម្ពុជា។

ទស្សនាវីដេអូ YouTube ដែលរៀបរាប់អំពីប្រវត្តិលោក ត្រឹង ងា[1]

ជីវប្រវត្តិសង្ខេបរបស់លោកត្រឹង ងា

-ថ្ងៃខែឆ្នាំកំណើត ០២ មករា ១៩៣៧

-ទីកន្លែងកំណើត ស្រុកយិងចូវ ខេត្តពលលាវ កម្ពុជាក្រោម

-ឆ្នាំ១៩៥៤ ប្រឡងជាប់មធ្យមសិក្សាបឋមភូមិ នៅកម្ពុជាក្រោម

-ឆ្នាំ១៩៥៦ ចូលមកប្រទេសកម្ពុជា រស់នៅភ្នំពេញបន្តការសិក្សា

-ឆ្នាំ១៩៥៦ ប្រឡងជាប់បញ្ញាប័ត្រមធ្យមសិក្សាភាគទី១

-ឆ្នាំ១៩៥៧ ប្រឡងជាប់សញ្ញាប័ត្រមធ្យមសិក្សាភាគទី២

-ឆ្នាំ១៩៥៧ ធ្វើសាស្ត្រាចារ្យនៅខេត្តបាត់ដំបង

-ឆ្នាំ១៩៦១ ផ្លាស់ពីបាត់ដំបងមកភ្នំពេញ បម្រើការងារនៅក្រសួងអប់រំ និងបន្តការសិក្សានៅមហាវិទ្យាល័យអក្សរសាស្ត្រ

-ឆ្នាំ១៩៦៥ ប្រឡងជាប់បរិញ្ញាប័ត្រអក្សរសាស្ត្រផ្នែកវប្បធម៌ និងអរិយធម៌អាស៊ី

-ឆ្នាំ១៩៧៣ ចងក្រងសៀវភៅប្រវត្តិសាស្ត្រខ្មែរ (ភាគ១ និងភាគ២)

-ឆ្នាំ១៩៧៣-១៩៧៤ អគ្គលេខាធិការវិទ្យាស្ថានខ្មែរ មន

-ឆ្នាំ១៩៧៤-១៩៧៥ នាយកវិទ្យស្ថានខ្មែរ មន

-ឆ្នាំ១៩៧៥ ជម្លៀសចេញពីទីក្រុងភ្នំពេញទៅកាន់ភូមិក្បាលដំរីក្រោម ស្រុកកោះធំ ខេត្តកណ្តាល

-ថ្ងៃទី២០ វិច្ឆិកា ១៩៧៥ ខ្មែរក្រហមបញ្ជូនដល់គុកទួលស្លែង

-ថ្ងៃខ្មែរក្រហមសម្លាប់ មិនច្បាស់លាស់

ជីវប្រវត្តិភរិយាលោកត្រឹង ងា

ភរិយាលោក ត្រឹង ងា ឈ្មោះ ឡាយ ហ៊ុនគី ដែលប្រជាជនខ្មែរ ជាពិសេសអ្នករដ្ឋការស្គាល់ថា អ្នកស្រី ត្រឹង ងា ។ អ្នកស្រី ឡាយ ហ៊ុនគី បាននិពន្ធសៀវភៅអរិយធម៌ខ្មែរ ដែលបោះពុម្ពផ្សាយនៅក្នុងឆ្នាំ១៩៧៤ ។ សៀវភៅអ្នកស្រី ឡាយ ហ៊ុនគី ក៏ល្បីល្បាញដូចជាសៀវភៅរបស់ស្វាមីអ្នកស្រីដែរ គឺត្រូវបានដាក់បញ្ចូលទៅក្នុងកម្មវិធីសិក្សាថ្នាក់ទីបញ្ចប់ក្នុងសម័យសាធារណរដ្ឋខ្មែរ ។

ការសិក្សាស្នាដៃ និងការងារ

-ថ្ងៃខែឆ្នាំកំណើត ២៤ វិច្ឆិកា ១៩៣៧

-ទីកន្លែងកំណើត ភូមិស្រមោច ឃុំព្រះនេត្រព្រះ ស្រុកព្រះនេត្រព្រះ ខេត្តបាត់ដំបង (បច្ចុប្បន្នជាខេត្តបន្ទាយមានជ័យ)

-ឆ្នាំ១៩៤៧ រៀននៅបឋមសិក្សា ខេត្តបាត់ដំបង

-ឆ្នាំ១៩៥៧ ធ្វើគ្រូបង្រៀននៅខេត្តបាត់ដំបង

-ឆ្នាំ១៩៦២ សិក្សានៅវិទ្យាស្ថានជាតិគរុកោសល្យផ្នែកអប់រំសាស្ត្រាចារ្យ

-ឆ្នាំ១៩៦៦ប្រឡងជាប់បរិញ្ញាបត្រអក្សរសាស្ត្រខ្មែរនិងជាសាស្ត្រាចារ្យនៅវិទ្យាល័យព្រះស៊ីសុវត្ថិ

-ឆ្នាំ១៩៧៤ និពន្ធសៀវភៅអរិយធម៌ខ្មែរ

-មុនថ្ងៃ១៧ មេសា ឆ្នាំ១៩៧៥ នាយិកាវិទ្យាល័យនារី ភ្នំពេញ

-ក្រោយថ្ងៃ១៧ មេសា ឆ្នាំ១៩៧៥ ជម្លៀសទៅភូមិក្បាលដំរីក្រោម ស្រុកកោះធំ ខេត្តកណ្តាល

-ឆ្នាំ១៩៧៦ ជម្លៀសទៅភូមិស្វាយជួរ ស្រុកកោះធំ ខេត្តកណ្តាល

-ឆ្នាំ១៩៧៧ ជម្លៀសទៅភូមិបឹងច្រាំង ស្រុកមោងឫស្សី ខេត្តបាត់ដំបង

-ឆ្នាំ១៩៧៨ ជម្លៀសទៅភូមិចកតូច ឃុំចកតូច ស្រុកមោងឫស្សី ខេត្តបាត់ដំបង

អ្នកស្រី ឡាយ ហ៊ុនគី ត្រូវបានគេស្គាល់ទូទៅថា អ្នកស្រី ត្រឹង ងា គឺជាសាស្ត្រាចារ្យ និងជាប្រវត្តិវិទូដ៏ល្បីល្បាញម្នាក់នៅប្រទេសកម្ពុជា។ អ្នកស្រី គឺជាអ្នកនិពន្ធសៀវភៅអរិយធម៌ខ្មែរ សម្រាប់ថ្នាក់ទីបញ្ចប់ បោះពុម្ពឆ្នាំ១៩៧៤។

-ឆ្នាំ១៩៧៩ លក់ដូរនៅទីរួមស្រុកមោងឫស្សី ខេត្តបាត់ដំបង និងទីរួមស្រុកមង្គលបូរី ខេត្ត

បាត់ដំបង (បច្ចុប្បន្នជាខេត្តបន្ទាយមានជ័យ)

-ឆ្នាំ១៩៨៣ នាយិកាវិទ្យាល័យមង្គលបូរី ស្រុកមង្គលបូរី ខេត្តបន្ទាយមានជ័យ

អ្នកស្រី ឡាយ ហ៊ុនគី ជាសាស្ត្រាចារ្យបរិញ្ញាបត្រអក្សរសាស្រ្តខ្មែរ ជានាយកសាលាមធ្យមសិក្សាកម្រិត២ ស្រុកមង្គលបូរី ឆ្នាំ១៩៨៥-១៩៨៦ និងជានាយកនៃវិទ្យាល័យមង្គលបូរី នៅថ្ងៃទី២៤ ខែកក្កដា ឆ្នាំ១៩៩០។

-ឆ្នាំ១៩៩៥-បច្ចុប្បន្ន ចូលនិវត្តន៍ (រស់នៅទីរួមស្រុកមង្គលបូរី ខេត្តបន្ទាយមានជ័យ)

(ថ្ងៃបុណ្យវិសាខបូជារបស់អ្នកស្រីត្រឹង ងា ថ្ងៃទី៣០ ខែមេសា ឆ្នាំ២០១៨ ស្រុកមង្គលបូរី ខេត្តបន្ទាយមានជ័យ)

ឪពុកម្តាយ

-ឪពុកឈ្មោះ ឡាំ ស៊ុង ជនជាតិខ្មែរ កើតនៅឆ្នាំ១៩១៤ ក្នុងស្រុកថាញ់ហ៊ឹង ខេត្តពលលាវ កម្ពុជាក្រោម ។ កាលនៅកម្ពុជាក្រោមធ្លាប់ធ្វើទាហានបារាំង ក្រោយមកធ្វើប៉ូលីសវៀតណាមខាងត្បូង។ គាត់មករស់នៅភ្នំពេញ ឆ្នាំ១៩៦៥ ស្លាប់នៅឆ្នាំ ១៩៧៧ ក្នុងរបបខ្មែរក្រហម ដោយសារភាពអត់ឃ្លាន និងជំងឺគ្មានថ្នាំព្យាបាល ។

-ម្ដាយឈ្មោះ ទិន សៀម ជនជាតិខ្មែរ កើតនៅឆ្នាំ១៩១៥ ក្នុងស្រុកថាញ់ហ៊ឹង ខេត្តពលលាវ កម្ពុជាក្រោម ។ ធ្វើជាមេផ្ទះតាំងពីដើមមក គាត់មករស់នៅភ្នំពេញ ឆ្នាំ១៩៦៥ ស្លាប់នៅឆ្នាំ ១៩៧៧ ក្នុងរបបខ្មែរក្រហម ដោយសារភាពអត់ឃ្លាន និងជំងឺគ្មានថ្នាំព្យាបាល ។

(លោកយាយ ត្រឹង ងា បច្ចុប្បន្ននៅរស់ក្នុងវ័យជរា នៅខេត្តបន្ទាយមានជ័យ ក្នុងជន្មាយុ ៨០ ឆ្នំា )

ជីវិតគ្រួសារ

អ្នកស្រី ឡាយ ហ៊ុនគី បានរៀបអាពាហ៍ពិពាហ៍ជាមួយលោក ត្រឹង ងា ហើយដែលឈ្មោះនេះត្រូវបានគេស្គាល់ជាទូទៅថាជាអ្នកស្រី ដោយសម័យនោះហៅតាមទម្លាប់បារាំង គឺហៅឈ្មោះស្វាមី។

បងប្អូនបង្កើត

លោក ត្រឹង ងា មានបងប្អូនបង្កើតបីនាក់គឺ ត្រឹង ធីហ៊ូន ត្រឹង ងា និង ត្រឹង ថាច់៖

-ត្រឹង ធីហ៊ូន (ភេទស្រី) កើតនៅឆ្នាំ១៩៣២ នៅភូមិព្រែកជ្រៅ ស្រុកថាច់ហ៊ឹង ខេត្តពលលាវ កម្ពុជាក្រោម ។

-ត្រឹង ងា

-ត្រឹង ថាញ់ ស្លាប់កាលពីអាយុ៩ឆ្នាំ

កូនបង្កើត

លោក ត្រឹង ងា មានកូនចំនួន៤នាក់៖

-ត្រឹង បញ្ញារិទ្ធិ ភេទប្រុស កើតនៅឆ្នាំ១៩៥៩ ស្លាប់នៅឆ្នាំ ១៩៧៨ ក្នុងរបបខ្មែរក្រហម ដោយសារភាពអត់ឃ្លាន និងជំងឺគ្មានថ្នាំព្យាបាល ។

-ត្រឹង សុគន្ធវារី ភេទស្រី កើតនៅឆ្នាំ១៩៦០ ស្លាប់នៅឆ្នាំ ១៩៧៧ ក្នុងរបបខ្មែរក្រហម ដោយសារភាពអត់ឃ្លាន និងជំងឺគ្មានថ្នាំព្យាបាល ។

-ត្រឹង បញ្ចារុណ ភេទប្រុស កើតនៅឆ្នាំ១៩៦៧ បច្ចុប្បន្នរស់នៅទីក្រុងភ្នំពេញ

-ត្រឹង សុន្ថារា ភេទប្រុស កើតនៅឆ្នាំ១៩៦៨ បច្ចុប្បន្នរស់នៅប្រទេសអូស្ត្រាលី

កូនប្រុសទី១ និងកូនស្រីទី២

អ្នកស្រីឡាយ ហ៊ុនគី កូនប្រុសទី៣ និងកូនប្រុសទី៤

អ្នកស្រីត្រឹង ងា និងកូនទាំង២ (២៦ ធ្នូ ២០១៧)

អ្នកស្រីឡាយ ហ៊ុនគីកូនប្រុសទី៣ និងកូនប្រុសទី៤ នាឆ្នាំ១៩៨១

សៀវភៅ«អង្គការនរក» និពន្ធដោយលោកត្រឹង បញ្ចារុណ (កូនប្រុសទី៣ របស់លោកត្រឹង ងា) រៀបរាប់អំពីប្រវត្តិលោកត្រឹង ងាក្នុងរបបកម្ពុជាប្រជាធិមតេយ្យ (របបខ្មែរក្រហម) នាឆ្នាំ២០០៧ ។